總會不斷有美女, 在facebook叫人加她的line或微信, 但其實這些全部都是點數黨詐騙.
其實蒲開嘅巴打都知，無論係去骨場、一樓一定幫襯企街，畀錢呢個動作點都會係交易後先做，就算有部份真‧援交驚個客走數，想事先收錢，都會係喺大家見到面入咗房之後「先收錢後交易」。「點數黨」呢一個咁乞人憎嘅騙人行業，就係指利用呢啲男人嘅色心，去詐騙嘅一個壞人集團。咁究竟「點數黨」係點樣行騙嘅呢？
1. 點數黨主要用WeChat搵食，因為WeChat同時都係真‧援交搵食嘅地方，點數黨嚟一招「魚目混珠」，等新手分唔清真假；
2. 點數黨WeChat帳戶嘅相絕大部份都係靚女或大波妹，或者係靚女大波妹，而且張張露面（唔出樣又點引到巴打們注意），但真‧援交一向都注重私隱，有樣嘅相唔會放；
3. 由於靚女相唔係個個有，尤其係「點數黨」背後根本就係成批男騙徒，唔會有真嘅相俾到你，所以佢地帳戶十成十都係Copy其他人嘅相返嚟，建議新手可以Save低對方頭像，然後放上Google使用圖片搜尋功能，你就會見到同一張相嗰個可能就係台灣某某三四線明星或Model仔；
4. 點數黨會好積極撩巴打交易，通常來回唔夠幾句就會主動用呢一類唔咸唔淡嘅字句同您講：「哥哥，我宜家缺錢/我在讀大學，現在個人有在兼職援交，你想約我嗎？」
（試諗下：個頭像咁「靚女」都仲要出聲撩你交易，真係貪哥哥你靚仔咩？)
5. 「點數黨」都會有變招嘅時候，佢地都知道呢種手法通哂天，有部份「點數黨」會事先自爆唔係呃你，甚至會主動話你知地址，令到成件事好似好信得過咁，但細心啲睇下啲地址，你會發現有呢啲例子，你會認為援交出提供呢啲中原地圖嘅地址嗎？
「青龍頭浪翠園(二期)B座二樓」
「天馬苑駿安閣D座十六樓」
「天水圍嘉湖銀座(三期)二十四樓」
6. 「點數黨」提供假地址係一個心理戰術，如果你只係坐喺屋企叫你買點數，你可能會唔信，但如果昆到你出街，假設昆到你由柴灣入屯門，去到假地址樓下先叫你買點數，你會買點數嘅動機就大得多了。
7. 如果你一直都表現得懷疑，唔相信佢，「點數黨」就會使出一招「以退為進」嘅腔調留一句：「你都沒有心做交易那就算。」之後就唔出聲，讓你個心覺得唔好意思又囉囉孿，然後又自動落搭。
8. 其實無論你點樣表現得唔信，又或者你已經熟知騙徒嘅玩法。講真，作為一個騙子，佢地同一時間用同一套方式傾緊幾十個帳戶。呢個呃唔到咪做下一個，佢唔會浪費時間係一啲懷疑佢嘅人面落力落咀頭，因為咁樣唔合乎成本效益，佢要呃嘅唔係你，係一啲從來無遇過呢啲事嘅人。
9. 終於入戲肉，咁究竟乜嘢係「買點數」呢？好地地一宗交易唔用錢而要去7仔或者OK買張點數劵做乜春？點數劵其實只係一張收據，每張點數劵收據上面都會有一組序號同密碼，可以按您個序號密碼為自己個帳戶增值，如果你買咗一張價值$1,300嘅點數劵（類型可以係淘點劵或其他網上交易系統嘅充值劵），咁你就可以憑個序號同密碼去增值$1,300落個網上帳戶。「點數黨」主要都係會以「第一次同你做性交易，驚你係警察放蛇，所以唔會用現金交易」為理由，要求你先去7仔OK買點數劵，然後再要求你影張劵畀佢睇以作屬實。如果你影咗比佢，咁你就GG喇！其實佢只係要你張劵上面個序號密碼，Once個序號密碼一到手，過咗數入佢帳戶，佢就可能唔會再同你傾計/聯絡/甚至Delete埋你，但如果覺得你好呃嘅......你睇埋落去就知喇！
10. 嗱嗱嗱，萬一你中招上當（嗰一下你當然唔會覺自己蠢咗），咁嗰位「靚女」就會叫你留埋個電話俾佢，佢會話佢個經理人想同您傾下（當然個經理人係男人啦），打俾你叫你去買多兩張劵做保證金，咁先可以一親香澤。即係見你好昆就再昆多幾千蚊，如果你好彩當下醒覺，個「經理人」就會同你反面，話有晒你電話，會騷擾你屋企人，又話會伏你做你。貫徹有得呃就呃到盡嘅本色，因為佢地知道呢一套方式只會喺你身上用到一次，唔呃到盡又點對得住自己。但係呢，呢啲恐嚇嘅說話人人都識講，係睇你地信唔信嘅啫。
總結，「點數黨」所做嘅嘢其實有好多都唔合邏輯，但係當「色字當頭」又有幾多巴打會理性思考，佢地就係捉住你嘅色心行騙，因為就算你真係俾人呃咗，佢都睇死你唔敢話俾人知 - 「你搵援交」﹗
網上有流傳踢爆「點數黨」嘅三個自保手法：
1. 遇上靚女撩你，先Copy相去Google睇下係咪假相；
2. 即興打一段字，叫對方開語音讀一次；
3. 直接同對方聲明你係絕對唔會買點數，睇下佢會唔會Block你，佢Block咗你嘅，咁就真係恭喜你：「幸免於難」
新聞來源：https://goo.gl/gh2qk5
晴報「男扮援交女 騙14歲仔三千元」 2017年6月27日
| 
